Engadiner-Post vom 19.11.2015:

La Regiun dal Parc Naziunal dombra 90 societats e clubs da sport. Quistas societats pon as partecipar a l’organisaziun da tet e da promoziun da sport. Il prüm ston però ils cumüns ed il Chantun dar glüm verda.

Nicolo Bass

«Che maina quai a mia società?» Quista dumonda es statta il center da l’infuormaziun a reguard il preproget per ün’organisaziun da tet per tuot las spüertas da sport in Engiadina Bassa e Val Müstair. Raduond 90 societats da sport da la regiun sun gnüdas invidadas a quist’orientaziun in lündeschdi saira a Scuol, üna trentina da persunas han finalmaing tut part. Gerhard Hauser, president da la Società da promoziun dal sport da skis da la Regiun dal Parc Naziunal, e Marco Ritzmann, president dal Club da Hockey Engiadina, han preschantà lur visiun.

Fingià duos ons tscherchan las duos societats ün möd da collavuraziun per trar a nüz sinergias e nun as concurrenzar in tschercha da sponsuors. Reto Rauch es gnü incumbenzà d’elavurar il preproget chi’d es gnü finanzià da la Corporaziun Energia Engiadina cun 20 000 francs.

Tuot l’artichel sco PDF: 2015.11.19_SESVM_EPPL_SE9